Ognartøkan til flogvøllin aftur í rættinum

Hagaparturin Ytri Suttringur (Ytri Suðurtriðingur) og partafelagið Vága floghavn eru ikki liðug við ognartøkuna, sum var gjørd, tá flogvøllurin var longdur.

Tey skulu aftur í Føroya rætt í morgin.

Hagaparturin hevur stevnt Vága floghavn. Talan er um okkurt um tvær milliónir krónur.

Atlantic Airways, Vága Floghavn, flogvøllurin

Nú økið er endaliga matrikulerað, er tað 13.000 fermetrar størri, enn metingin segði. (Savnsmynd: Bjarni Árting Rubeksen)

13.000 fermetrar størri

Tá ognartøkan var í 2009, var metingin, at ognartikna lendið, har sum grótið til flogvøllin var tikið, var 193.000 fermetrar.

Nú økið er endaliga matrikulerað, er tað 13.000 fermetrar størri, enn metingin segði.

Eystari landsrættur ásetti endurgjaldið í 2016.

Tað var minni enn helvtina av tí, sum hagaparturin kravdi. 

Krevja meira

Vága floghavn vil gjalda sama fermetrarprís, sum Landsrætturin ásetti, fyri tað, sum er komið aftrat.

Men hagaparturin krevur meira i endurgjaldi.

Og nú skal Føroya rættur skera ígjøgnum.