Ísrael hóttir við álopi á Rafah, verða gíslar ikki latnir leysir

Verða gíslarnir í Gasa ikki latnir leysir næstu tríggjar vikurnar, fer ísrael at søkja at býnum Rafah har suðuri í Gasa við landhermegi.

Tað vóru boðini hjá Benny Gantz, sum er limur í ísraelska krígsráðnum, tá ið hann helt røðu á einari amerikansk-jødiskari ráðstevnu í Jerusalem, skrivar danska kringvarpið.

Ísraelska krígsráðið var sett á stovn eftir yvirgangsálopið hjá Hamas 7. oktober. 

Sambært ísraelska herinum, eru okkurt um 130 gíslar í Gasa enn. Óvist er tó, hvussu nógvir eru á lívi.

- Heimurin skal vita av hesum, og Hamas-leiðararnir eisini: Um okkara fólk, sum sita í fangaskapi, ikki eru heima fyri Ramadan, halda bardagarnir fram, eisini í Rafah-økinum, segði Benny Gantz sambært fleiri miðlum, millum anað BBC og Times of Israel.

Byrjar 10. mars

Muslimski hátíðarmánaðurin, Ramadan, byrjar sunnudagin 10. mars.

Rafah er nærindis markinum millum Gasa og Egyptaland, og eftir at Ísrael fór inn í býin Khan Younis, eru fleiri hundraðtúsund palestinar flýddir til Rafah.

Sambært altjóða hjálparfelagsskapum, millum annað Læknum uttan landamark og Reyða krossi, eru yvir 1,3 milliónir palestinar í og uttan fyri Rafah.

Benny Gantz legði aftrat, at Ísrael vil samstarva við USA og Egyptaland um at hjálpa sivilum úr býnum.

Ísraelska stjórnin hevur ikki váttað tað, sum Benny Gantz hevur sagt.