Grundfos selir virksemið í Russlandi

Tað hevur drigið út, men nú hava russisku myndugleikarnir góðkent, at stóra danska fyritøkan Grundfos selir alt sítt virksemi í Russlandi.

Tað var á sumri 2022, at Grundfos kunngjørdi, at fyritøkan fór at taka seg heilt úr Russlandi eftir at hava steðgað á við virkseminum, tá ið Russland gjørdi innrás í Ukraina fyri tveimum árum síðani.

Framleiðslufelagið hjá Grundfos í Russlandi verður selt lokalu leiðsluni í felagnum. 

Staturin yvirtók Carlsberg

Tað sær sostatt út til, at tað hevur gingið betur hjá Grundfos at sleppa sær av við virksemið í Russlandi enn hjá fleiri øðrum fyritøkum, sum hava roynt tað sama, men eru komnar illa fyri.

Eitt nú Carlsberg, sum noyddist at veittra farvæl til bryggjaríini hjá sær í Russlandi, eftir at russiski staturin uttan víðari yvirtók ræðisrættin á bryggjaríunum.

Sambært danska Ekstrablaðnum hevur Carlsberg ongar vónir um nakrantíð at fáa bryggjaríini í Russlandi aftur frá russiska statinum.