Landsferðslunevndin skal viðgera listina í Sandoyartunlinum

Málið um listina í Sandoyartunlinum verður tikið upp í Landsferðslunevndini. 

Tað upplýsti Michael Boolsen, fúti, fyri Degi og Viku í gjárkvøldið.

Landsferðslunevnin er eitt samstarv millum politiið og Landsverk, sum eru ferðslu- og vegamyndugleikar. Aftrat sær hava tey Akstovuna og Ráðið fyri Ferðslutrygd sum ráðgevandi partar.

Landsferðslunevndin er tískil eitt forum, har partarnir viðgera ivamál og spurningar, sum hava við ferðslu at gera, áðrenn avgerðir verða tiknar av avvarðandi pørtum.

Sandoyartunnilin

Sparkaði bóltin til fútan

Tað var annars aðalstjórin í Fiski- og samferðslumálaráðnum, sum sparkaði bóltin til fútan at taka avgerð um, hvør hevur avgerðarrætt at siga, um listin í Sandoyartunlinum er til bága fyri ferðsluna.

Tað sæst í innliti hjá Kringvarpinum.

Landsverk bað Samferðslumálaráðið vátta, at landins vegamyndugleiki viðvíkjandi vegum á landi og vegum í undirsjóvartunlum liggur hjá Landsverki, tí Landsverk søguliga eisini hevur havt eitt yvirskipað eftirlit við trygdini í øðrum undirsjóvartunlum.

Sandoyartunnilin, list í Sandoyartunlinum

Váttanin kom ikki

Men hendan váttan kom ikki. 

Í staðin segði Elin Mortensen, aðalstjóri í Samferðslumálaráðnum, at tað helst var fútin, sum má taka avgerð, um listaverkini eru ein bági fyri ferðsluna eftir grein 49, stk. 2, í ferðslulógini.

Tann greinin sigur: "Skelti, reklamur, ljósvæl o.t., sum sæst frá gøtu, veg ella plássi, kann politivaldið krevja burtur, um so er, at tey ..... eru villandi ella til stórvegis bága fyri ferðsluna.”

Hetta er sama grein, sum Teitur Samuelsen, stjóri í Sandoyartunlinum, vísti til 8. januar, tá hann kveistraði boðini frá Landsverki um listina til viks, og somuleiðis segði, at Landsverk ikki skuldi góðkenna listina.

So, meðan Landsverk ikki fær greitt at vita, at tey eru vegamyndugleiki, og avgerðin um listina er løgd til fútan, so fer fútin í landsveganevndina at viðgera spurningin saman við Landsverki.