Kári Mortensen fingið herðaklapp

Tá ið næstformaðurin í felagnum, Ásmundur Guðjónsson, handaði heiðurin, nevndi hann millum annað úr grundgevingini, at Kári í nógv ár hevur verið sera virkin í norðurlendska samstarvinum á sínum øki, som er orkupolitikkur.

Hann hevur brennandi áhuga fyri norðurlendska samstarvinum, og í føroyskum høpi er hann ein eldsál, sum altíð er til reiðar at tosað norðurlendska samstarvið upp, og hann sær møguleikarnar, vit føroyingar hava at gangnýta samstarvið við okkara brøðrafólk.

Annars setti Norðurlandadagurin hesaferð sjóneykuna á norðurlendskt samstarv, sæð úr einum ungum sjónarhorni, og trivnaður - serliga í útjaðaranum - var í miðdeplinum.

Ung úr Føroyum, Íslandi og Danmark høvdu framløgur um norðurlendskar samstarvsmøguleikar og skipanir, sum styrkja økið, og eisini var pallborðsorðaskifti.

Tað vóru Norðurlandahúsið, NORA, Norrøna Felagið í Føroyum og Uttanríkis- og Vinnumálaráðið, ið bjóðaðu til Norðurlandadagin, sum varð hildin í Norðurlandahúsinum.