Fingu bjóðað 80.000 kr. fyri tvey atgongumerki til síðsta dystin hjá Klopp

Týski venjarin hjá Liverpool, Jürgen Klopp, hevur kunngjørt, at hetta er hansara seinasta kappingarár í venjarasessinum. 

Karismatiski venjarin verður fagnaður av Liverpool-fjepparum um allan heim. 

Nógv eygu eru longu nú vend móti síðsta dystinum í Premier League, sum er ímóti Wolves og verður spældur á Anfield Road sunnudagin 19. mai.

Janus og sonurin hava pláss

Ein, sum er so heppin at hava atgongumerki til henda søguliga dystin, er Janus Mouritsson Joensen. Hann og sonurin hava pláss nakað aftanfyri har venjararnir sita. 

Teir hava eisini lagt til merkis, at fleiri kundu hugsað sær atgongumerki til dystin. Higartil er boðið 80.000 krónur, men svarið er bums nei.

Hetta verður ein ógvuliga serstøk uppliving, og tí kemur tað ikki upp á tal at selja, sigur Janus, ið hevur verið Liverpool-fjeppari í eini 30 ár.