Ætla nú at útvega annað skip fyri Tjaldrið

Landsstýrið fer í næstum at fyrireika at byggja ella útvega skip í staðin fyri Tjaldrið.

Tað upplýsir Dennis Holm, landsstýrismaður í fiskivinnumálum, í frágreiðingini um sjófeingi, sum hann legði fyri tingið í dag.

Tjaldrið er 48 ára gamalt og ikki tíðarhóskandi, og tað er sera torført at útvega skipinum eykalutir, sigur landsstýrismaðurin.

Fyri at kunna røkja altjóða eftirlitsskyldur, at hava góða tilbúgving og kunna veita neyðstøddum hjálp í stóra havøkinum kring Føroyar, er neyðugt at hava tvey virkin skip til endamálið.

Dennis Holm

NATO-venjingar

Dennis Holm sigur, at broytta heimspolitiska støðan og økta skipaferðslan hava eisini við sær, at tørvur er á at menna munagóða oljutilbúgving, og at styrkja førleikarnar at vera við í verju- og trygdarátøkum í okkara parti av Norðuratlantshavi, t.d. í sivilum NATO-flotavenjingum.

Farið verður í næstum undir at fyrireika at byggja ella útvega skip í staðin fyri Tjaldrið, sigur landsstýrismaðurin í fiskivinnumálum.

Orðaskifti um frágreiðingina frá Dennis Holm verður í løgtinginum 18. apríl.

Les frágreiðingina her.