Nýggjur verjumálaráðharri skal fyrireika Russland til drúgt kríggj

Russiski forsetin, Vladimir Putin, ger broytingar í stjórnini. 

Putin hevur sett Andrej Belousov til nýggjan verjumálaráðharra, sum kemur í staðin fyri Sergej Sjojgu.

Belousov hevur verið varaforsætisráðharri í stjórnini hjá Putin síðani 2020. 

Sjojgu, sum hevur verið verjumálaráðharri síðani 2012, skal nú vera leiðari fyri russiska trygdarráðið, skrivar tíðindastovan Reuters.

Amerikanski stovnurin ISW - Institute for the Study of War - tulkar broytingina í russisku stjórnini soleiðis, at Putin er í ferð við at fyrireika russiska búskapin og hermegina til eitt langt kríggj, møguliga móti NATO. 

Belousov hevur ongar beinleiðis hernaðarligar royndir, men hann er búskaparfrøðingur og hevur neyvt innlit í russiska búskapin.

Hann tekur við sum verjumálaráðharri í eini tíð, har útreiðslurnar til russisku hermegina eru øktar til sjey prosent av landsins bruttotjóðarúrtøku.

Mette Frederiksen og Joe Biden

Mette Frederiksen, forsætisráðharri, á vitjan hjá Joe Biden, forseta í USA. Mette Frederiksen sigur seg fegnast um, at øll Norðurlond standa saman um NATO. (Savnsmynd: Ritzau Scanpix)

Toppfundur um trygd í dag

Trygdarpolitikkur er á skránni, nú seks lond hittast á toppfundi í Stokkholm ídag. 

Við á fundinum eru ríkis- og stjórnarleiðarar úr Svøríki, Norra, Danmark, Finnlandi, Íslandi og Týsklandi.

- Vit liva í eini tíð við kríggi í Evropa og eini hóttan úr Russlandi, sum roynir at seta kílar í Vesturheimin. Tí er at fegnast um, at Norðurlond nú øll standa saman um NATO, sigur danski forsætisráðharrin, Mette Frederiksen, í tíðindaskrivi undan fundinum.

Á toppfundinum í svenska høvuðsstaðnum í dag fara leiðararnir eitt nú tosa um hybrid-hóttanina úr Russlandi.

Fyri viku síðani søgdu donsku trygdartænasturnar, PET og FE, at vandin fyri einum russiskum hybrid-kríggi móti Danmark er øktur.

Tað eru bæði danskir myndugleikar, fyritøkur og felagsskapir, sum hava relatiónir til Ukraina, ið eru í vanda fyri álopum.