- Tíðindi, mentan og ítróttur
EM í fótbólti: Stóruppgerðir í Týsklandi í dag
EM í fótbólti: Stóruppgerðir í Týsklandi í dag
Tveir sannir stórdystir eru á skránni í EM-endaspælinum í dag. Í bólki C spæla Ongland og Danmark, meðan Spania og Italia bresta saman í bólki B
Ensk viðhaldsfólk við Romerberg-torgið í Frankfurt undan dystinum ímóti Danmark í seinnapartin
Mynd: Jana Rodenbusch/Reuters/Ritzau Scanpix
20.06.2024 - 14:55
Tveir stórdystir eru á skránni í EM-endaspælinum í Týsklandi í dag.
Í bólki C spæla Ongland og Danmark klokkan 17.00. Real Madrid-stjørnan Jude Bellingham tryggjaði onglendingum tepran 1-0 sigur á Serbia í 1. umfari, og vinnur Ongland á Danmark í dag, hava teir spælt seg víðari í kappingini.
Danmark hevur hinvegin stóran tørv á stigum. Christian Eriksen skoraði í dystinum ímóti Slovenia í 1. umfari, men slovenar javnaðu, og liðini fingu eitt stig í part.
Donsk viðhaldsfólk vóna, at Danmark fær stig ímóti Onglandi í dag. MYND: Jana Rodenbusch/Reuters/Ritzau Scanpix
Risar bresta saman
Evropeisku stórtjóðirnar, Spania og Italia, bresta saman í 2. umfari í bólki B. Spania smurdi Kroatia av í fyrsta dystinum, har bert 16 ára gamli Lamine Yamal gjørdist ynski spælarin higartil, sum hevur spælt í einum EM-endaspæli.
Albania skelkaði Italia, tá Nedim Bajrami skoraði longu eftir 23 sekundum í 1. umfari. Við málum frá Alessandro Bastoni og Nicolò Barella eydnaðist kortini italiumonnum at venda hóttandi tapinum til sigur.
Ein sigur tryggjar vinnaranum eitt pláss í endaspælinum, meðan ein javnleikur eisini kann vera nóg mikið.
Triði dysturin í dag er í bólki C. Hann er ímillum Slovenia og Serbia.
Er kopiera
Nýggjastu sendingar í ÚV
Nýggjastu sendingar í SV
