Tjóðveldi bjargaði ætlanunum hjá borgarstjóranum - staðseting ikki broytt

Tað gjørdist eitt drúgt og stundum hart orðaskifti, tá Tórshavnar Býráð í kvøld skuldi samtykkja leigusáttmálan fyri lendi, har komandi tjóðleikhúsið skal standa.

Eftir orðaskifti hevði verið í meir enn ein tíma bleiv atkvøtt, og tá vóru níggju atkvøður fyri uppskotinum og fýra vóru ímóti. Millum tær sum vóru ímóti vóru atkvøðurnar hjá Annfinni Brekkstein, varaborgarstjóra og Kára Johansen, floksfelaga hjá borgarstjóranum. 

Teir talaðu eisini harliga ímóti ætlanunum, og mæltu báðir til, at finna aðra staðseting til tjóðleikhúsið, hóast staðsetingin á Eystaru Bryggju í havn er samtykt av býráðnum. Teir vístu eisini á frágreiðingina hjá havnastjóranum, sum vísti á, at havnavirksemið fer at vera nógv darvað av tjóðleikhúsinum, um hann verður staðsettur á Eystaru bryggju.

Borgarstjórin hevði tískil tørv á hjálp og hon kom frá fyrrverandi borgarstjóranum Anniku Olsen og restini av Tjóðveldinum í býráðnum, sum øll atkvøddu fyri ætlanini. 
Annika Olsen hartaði tó eisini býrðanum fyri at hava flutt staðsetingina einaferð áður - av Skálatrøð og yvir á Eystaru bryggju - og segði, at alt málið var blivið til ein stóran politiskan vavgreyt. Tí var neyðugt at fáa málið avgreitt, helt fyrrverandi borgarstjórin millum annað.

Áðrenn býráðið atkvøddi fyri uppskotinum frá fíggjarnevndini og borgarstjóranum, varð atkvøtt um eitt broytingaruppskot frá Kára Johansen um at finna nýggja staðseting til Tjóðleikhúsið. Tað fall við sama atkvøðulutfalli - níggju ímóti og fýra fyri.

Málið um leigusáttmálan skuldi annars vera avgreitt 20. juni. Tá var tað á skrá býráðsfundin, men var tikið av skrá beint undan fundinum. Tá segði Heðin Mortensen, borgarstjóri at hann framvegis væntaði at fáa semju um málið. Nakrar broytingar vóru gjørdar í sáttmálanum, sum býráðið samtykti í kvøld í mun til tann sum var á skrá 20. juni. Millum annað, at farast skal undir at byggja tjóðleikhús í seinasta lagi í 2029. Hetta var annars 2031.