Labour vinnur og Konservativi flokkurin tódnar niður í helvt

Val er í Bretlandi í dag, og valhølini lótu upp klokkan sjey í morgun.

Eftir 14 ár í andstøðu stendur Labour við Keir Starmer á odda til at vinna valið.

Nýggjastu metingarnar vísa, at Labour fer at fáa góð 40 prosent av atkvøðunum. Hetta kann gerast nóg mikið til, at flokkurin einsamallur fær sannførandi meiriluta í Westminster.

Konservativi flokkurin, sum hevur sitið við valdi síðani 2010, tykist hinvegin gerast stóri taparin.

Flokkurin, sum í 2019 fekk meira enn 43 prosent av atkvøðunum, stendur til at missa um helmingin av undirtøkuni. 

Rishi Sunak á vali

Rishi Sunak, forsætisráðharri, og kona hansara, Akshata Murty, á parlamentsvali í morgun. (Mynd: Reuters(Ritzau Scanpix)

Ivasamt um Sunak verður afturvaldur

Ein samanteljing av ymiskum veljarakanningunum hjá BBC vísir, at konservativi flokkurin fer at fáa um 21 prosent av atkvøðunum. Og so illa stendur til, at sjálvt í valdøminum hjá sitandi forsætisráðharra Rishi Sunak er ivamál um hann megnar at vera afturvaldur, skrivaði the Guardian í gjár. 

Tað hevur verið nógv rok í Konservativa flokkinum seinastu árini, og hann tykist hava mist nógvar veljarar til Reform UK flokkin við brexit-oddamanninum, Nigel Farage, á odda. Reform UK verður sambært veljarakanningunum triði størsti flokkur, og fær umleið 16 prosent av atkvøðunum. 

Valhøli í Bretlandi, parlamentsval í Bretlandi

Valhølini lótu upp klokkan sjey í morgun, og 49 milliónir fólk hava valrætt. (Mynd: Reuters/Ritzau Scanpix)

49 mió. hava valrætt

Og hóast munurin millum serliga Labour og Konservativa flokkin tykist stórur, so er hann í roynd og veru minkaður nakað seinastu dagarnar, tó ikki so nógv, at ivi tykist vera um úrslitið.

Bretland er býtt í 650 valdømi, og eitt umboð verður valt í hvørjum valdømi. 

Um 49 mió fólk hava valrætt á valinum í dag.