X skal rinda bót fyri lógarbrot í Avstralia

Ein avstralskur dómstólur hevur staðfest, at felagið hjá Elon Musk, nevnt X, skal rinda 650.000 avstralskar dollarar - tað svarar til slakarr tríggjar milliónir krónur - tí felagið hevur ikki megnað at greitt frá, hvussu pallurin verjir børn.

Tað skrivar NTB.

X skal eisini rinda 460.000 krónur í sakarmálskostnaði.

Málið snýr seg um eina áheitan frá eSafety, trygdareftirlitinum í Avstralia á netinum, í februar 2023. Eftirlitið bað fleiri stórar tøknifyritøkur, eitt nú táverandi Twitter, um at greiða frá, hvat tær gera fyri at berjast ímóti tilfari, sum vísir kynsligan ágang móti børnum.

Viðurkennir lógarbrot

X hevur viðurkent, at felagið breyt avstralsku lógina um trygd á netinum við ikki at lata inn frágreiðing, sum til fulnar svaraði spurningunum hjá eftirlitsmyndugleikanum.

Trygdarkommisserurin í Avstralia, Julie Inman Grant, sum áður hevur arbeitt hjá Twitter, sigur, at gjøgnumskygni er avgerandi, so at fyritøkurnar taka sína ábyrgd við í øllum.

- Hetta er ikki bara ein týðandi partur av okkara arbeiði sum eftirlitsmyndugleiki hjá Avstralia; tað gevur eisini almenninginum týðandi upplýsingar um, hvussu fyritøkurnar handfara tað ringasta av tí ringasta innihaldinum á sínum pallum, sigur hon.