Fólkatingskvinna: Rasisma móti grønlendingum verður ikki raðfest

- At ein donsk virkisætlan ímóti rasismu framvegis er seinkað, vísir bara, at rasisma ímóti grønlendingum í Danmark ikki verður raðfest.

Tað sigur grønlendska fólkatingskvinnan, Aaja Chemnitz, við grønlendska kringvarpið, KNR.

Afturi í januar í 2022 gjørdi ein politiskur meiriluti í Danmark avtalu um hesa virkisætlan, ið bæði skuldi útgreina, hvussu stór rasisman ímóti grønlendingum er í Danmark, og hvussu hon kundi niðurberjast við nýggjum átøkum.

Upprunaliga skuldi virkisætlanin verið kunngjørd í 2023, men hon er framvegis ikki komin.

- Nógvar kanningar vísa, at grønlendingar í Danmark uppliva mismun og rasismu, bæði sosialt og á arbeiðsmarknaðinum, so tað hevur týdning, at danski staturin tekur hetta í álvara, sigur Aaja Chemnitz.