Nýtt apotek kemur í Miðvági

Eitt nýtt apotek letur upp í Miðvági komandi vár.

Tað skrivar Heilsumálaráðið á síni heimasíðu.

Fólkatalið í Vágum er vaksið seinastu árini, umframt at talið av ferðafólkum um Vága Floghavn alsamt veksur. Eitt nýtt apotek í Vágum fer væntandi eisini at gera, at trýstið verður minni á apotekini í miðstaðarøkinum, og at bíðitíðin har tískil styttist, skrivar Heilsumálaráðið.

Avtala er gjørd um eitt leigumál í Miðvági, og arbeiðið at umvæla og innrætta bygningin til endamálið verður eftir ætlan liðugt 1. januar 2025.

Síðst í mars segði Hjalti Gunnarstein, landsapotekari, við útvarpið, at málið er at hava eitt apotek fyri hvørji umleið 10.000 fólkini í landinum.

Apotekið í Miðvági verður fimta apotekið í Apoteksverkinum. Hini eru Norðoya apotek, Eysturoyar apotek, Tjaldurs apotek og Suðuroyar apotek.

Næsta stig í handilsætlanini hjá Apoteksverkinum er at fáa eitt apotek afturat í miðstaðarøkinum.