Leiguíbúðir hjá Bústøðum í Fuglafirði kosta upp til 12.186 kr. um mánaðin

Millum 11.166 krónur og 12.186 krónur um mánaðin.

Tað er leigukostnaðurin fyri nýggju íbúðirnar á Toftanesvegi í Fuglafirði, sum eru millum 94 og 104 fermetrar til støddar, og sum Bústaðir bjóðaði út fríggjadagin. 

Hjørdis Gaard Lailudóttir, virkandi stjóri í Bústøðum, sigur, at leigan er sett út frá tí, sum bygningurin kostar at gera.

Fyrr í ár bjóðaðu Bústaðir nýggjar íbúðir út í Streymnesi fyri ein líknandi prís sum tann í Fuglafirði. Tá var eingin áhugi fyri íbúðunum, so Bústaðir noyddust at lækka leiguna við umleið 1.000 krónum um mánaðin.

Tað verður ikki neyðugt at lækka leigukostnaðin fyri nýggju íbúðirnar á Toftanesvegi í Fuglafirði, væntar virkandi stjóri í Bústøðum, tí áhugin hevur verið rættiliga stórur, síðan íbúðirnar vórðu bjóðaðar út fríggjadagin. 

Samlaði kostnaðurin at byggja tær 18 íbúðirnar á Toftanesvegi er 42 milliónir krónur. Fermetrakostnaðurin er 23.529 krónur uttan mvg.

Toftanesvegur 11, Fuglafjørður