Gasa: Friðarsamráðingarnar ganga væl

Ein roynd at fáa Hamas og Ísrael at gera friðaravtalu, hevur verið í høvuðsstaðnum í Katar, Doha í tveir dagar. 

Tað eru USA, Egyptaland og Katar, sum hava sitið við borðið.

Í gjárskvøldið skrivaði amerikanski forsetin, Joe Biden á X, at samráðingarnar seinastu 48 tímarnir hava snúð seg um vápnahvíld og leyslating av gíslum og fangum, og at samráðingarnar hava verið uppbyggiligar.

Ætlanin er at hittast aftur í næstu viku í Kairo, við tí í hyggju at gera eina friðaravtalu, sum byggir á tað, sum er avtalað nú. 

Stríðið millum Ísrael og Hamas hevur varðað síðani 7. oktober í fjør, tá Hamas leyp á Ísrael við rakettum og drap minst 1.400 fólk og tók umleið 240 gíslar.

Talið av deyðum í Gasa síðan 7. oktober í fjør er farið upp um 40.000, siga palestinsku heilsumyndugleikarnir, sum eru stýrdir av Hamas.