Kommunufelagið: Endurnýtslu- og bingjupláss mugu lata aftur

Politikkurin hjá landinum um burturkast fær av at vita frá kommununum.

Sum Kommunufelagið lesur uppskotið um burturkastkunngerðina, verður avleiðingin, at kommunali geirin, bæði IRF og kommunurnar hvør sær, skulu gera íløgur fyri tíggjutals milliónir krónur.

Men sum skilst skal landið ikki rinda eina krónu.

Og krøvini eru so strong og umfatandi, at meginparturin av kommunalu endurnýtslu- og bingjuplássunum má lata aftur.

Eingin kommuna hevur í dag umstøður, sum gera tað møguligt at lúka krøvini í kunngerðini. 

Rinda fyri umhvørvispolitikkin hjá landinum
 
Við øðrum orðum skulu kommunurnar rinda fyri umhvørvispolikkin hjá landinum.

Tøkkin til fólk, sum skulu gjalda, er, at kommunan sannlíkt steingir staðbundna endurnýtsluplássið. 

Hetta kunnu vit sjálvsagt ikki góðtaka, sigur Kommunufelagið.

Tað krevur, at landsstýrið alt fyri eitt steðgar á og fær málið aftur á beint.

Talan er ikki um eitt uppskot, sum kann sigast at verða orðað í samráði við kommunurnar, sum sagt verður í innganginum, sigur Kommunufelagið eisini.