BRIKS-londini vilja hava vápnahvíld í Gasa og Libanon í stundini

Londini í BRIKS-felagsskapinum hava umrøtt kríggið í Gasa og kríggið í Libanon, nú limalondini í hesum døgum hava toppfund í Russlandi.

Í dag helt iranski forsetin, Masoud Pezeshkian, røðu. Har heitti hann á limalondini at nýta alla orku at steðga báðum kríggjunum.

- Eg mæli øllum limum í máttmiklu BRIKS-sameiningini til at nýta sína megi og førleikar, bæði saman og sum einstakar tjóðir, at fáa ein enda á kríggjunum í Gasa og í Libanon, segði Masoud Pezeshkian á toppfundinum.

Reuters skrivar, at BRIKS-londini hava skrivað yvirlýsing, sum mælir til vápnahvíld í Gasa í stundini.

BRIKS-londini eru Brasil, Russland, India, Kina, Suðurafrika, Iran, Egyptaland, Etiopia og Sameindu Emirríkini.

Amerikanski uttanríkisráðharrin, Antony Blinken, hevur havt fund við krúnprinsin í Saudiarabia. Har skal hann sambært Reuters hava sagt tað vera alneyðugt at steðga krígnum í Gaza og at lata ísraelsku gíslarnar leysar.