Mentanargrunnurin skal umsita stuðul til filmsgerð

Mentanargrunnurin skal umsita stuðulin til filmsgerð.

Játtanin til Mentanargrunnin er í fíggjarlógaruppskotinum fyri 2025 hækkað 300.000 kr. til størri umsiting, nú grunnurin eisini skal hava film. 

Harumframt vera pengar til filmsráðgevar fluttir Mentanargrunninum frá Almanna- og Mentamálaráðnum. 

Eitt endamál við at lata Mentanargrunnin umsita filmsstuðul er at tryggja meginregluna um armslongd, sigur Mentamálaráðið.

Uppskot er eisini um, at fólk, sum fær listafólkaløn ella starvsløn frá Mentanargrunninum, fær 15 prosent í eftirløn aftrat lønini.

Og reglur skulu ásetast um stuðul til føroyskt tilfar til børn og ung.

Føroyskt tilfar til børn og ung

Fyri fyrstu ferð er játtan latin Mentanargrunninum, sum er markað til føroyskt tilfar, ætlað børnum og ungum. 

Ein millión krónur eru í fíggjarlógaruppskotinum.

Ásett er, at stuðul ikki verður latin stovnum við alment fíggjaðum rakstri. 

Treytin er, bæði viðvíkjandi filmi, eftirløn og tilfari til børn og ung, at løgtingið góðtekur tær játtanir, sum landsstýrið hevur í sínum fíggjarlógaruppskoti fyri 2025.