KÍ avlýsir ársveitslu - undirtøkan er ov lítil

Ársveitslan hjá KÍ er avlýst, tí undirtøkan er ov lítil.

Tað skrivar felagið á heimasíðu sínari.

Tá lýst var við ársveitsluni, skrivaði KÍ, at kappingarárið 2024 og 120 ára føðingdardagurin hjá felagnum skuldi hátíðarhaldast.

Men hátíðarhaldið verður av ongum.

Ársveitslan hjá KÍ skuldi verða í Varpinum leygarkvøldið 2. november. 

Felagið sigur, at árveitslan er avlýst, tí at undirtøkan hevur verið ov lítil til at bera tiltakið.

Atgongumerkini kostaðu 615 kr.

KÍ endaði á øðrum plássi í landskappingini í ár, seks stig aftan fyri Víking, sum gjørdist føroyameistari.

Í kappingini um løgmanssteypið gekk verri. KÍ tapti fyri HB í fyrsta umfarinum.