Ólóglig neyðbluss á Tórsvølli

Hóast finalan um Løgmanssteypið savnaði yvir 4.000 fólk á Tórsvølli í gjárkvøldið, var tað ógvuliga friðarligt í býnum í Havn.

- At tað var vindur og illfýsið veður, gjørdi kanska sítt til, sigur vakthavandi á Politistøðini í Havn.

Á Tórsvølli skrivaði politiið tó fýra mál um brot á nýggju fýrverkslógina, sum kom fyri einum lítlum ári síðani.

Hetta vóru fólk, sum høvdu neyðbluss tendrað inni á vøllinum, og tað fáa tey bót fyri.

Eisini var ein maður, sum var heldur ólátaður inni á stadion, skuldsettur fyri brot á skilhaldsreglurnar og fær bót fyri tað.

Ferðsluóhapp
Eitt ferðsluóhapp hendi í gjár við munnan á Eysturoyartunlinum hvítanesmegin, tá ið ein bilur ikki helt sína víkiskyldu, men koyrdi út fyri ein annan, ið ikki náddi at halda av.

Eingin fólkaskaði hendi, men tað darvaði ferðsluni eina løtu, at skaddu bilarnir stóðu á vegnum, men eftir hálvum tíma var alt ruddað av.