Stjórin í Betri Pensjón: Føroyingar taka ikki eins stóran váða á seg

Kanningin hjá Tyggingareftirlitinum vísir, at avkastið hjá teimum trimum  eftirlønarfeløgini í Føroyum, Lív, Betri Pensjón og Lívsverk liggur millum 3,2 og 3,5 prosent í miðal seinasu fimm árini.

Tað er bara helvtin av tí, tað er í Danmark, har avkastið er 6,8 prosent.

Vanliga siga eftirlønarfeløgini, at um ein tekur stóran váða, so kunnu hesir brúkararnir vænta at missa nógv, um tað gongur illa.

Í 2022 gekk sera illa, og tá var avkastið negativt, bæði í Føroyum og í Danmark.

Støðan ikki nóg góð

Men eisini hetta árið gekk verri í Føroyum enn í Danmark. Avkastið í Danmark var hetta árið -10,1%, meðan tað var -11,1% í Føroyum í miðal.

Helgi L. Petersen ásannar, at støðan er ikki nóg góð. Kundin í Føroyum fær ikki nóg stórt avkast samanborið við Danmark.

Hann vísir á, at tað eru nakrir heilt fáir kundar hjá Betri Pensjón, sum hava fingið stórt avkast, men at tað samstundis eisini eru fleir, sum hava fingið sera lítið avkast, væl undir miðal.

Helgi L. Petersen, stjóri í Betri Pensjón, væntar, at munurin millum Føroyar og Danmark verður ikki eins stórur um nøkur ár.