12 kommunur hava fingið nýggjan borgarstjóra

12 av teimum 29 kommununum fingu nýggjan borgarstjóra 1. januar. 

Í sjey kommunum stillaðu sitandi borgarstjórar ikki upp aftur. Tað var í Hvannasundi, Kunoy, á Sandi, í Húsavík, Skopun, Skúvoy og Vestmanna.

Í fýra kommunum var víst á annan borgarstjóra enn tann, sum sat. Tað var í Tórshavnar, Sunda, Sjóvar og Fugloyar kommunu. 

Á Eiði fall borgarstjórin valkvøldið.

Fýra eru nýggj í politikki

Av teimum nýggju borgarstjórunum eru tað fýra, sum eisini eru nýggj í kommunupolitikki. Tey eru Karl Vilhelm Hansen í Hvannasundi, Ólavur F. Nybo í Kunoy, Anna Paulina Leo Olsen í Húsavík og Jóanis í Hoygarðinum í Skúvoy. 

Borgarstjórin í Eiðis kommunu, Jógvan í Skorini, er einasti av teimum nýggju borgarstjórunum, sum áður hevur røkt borgarstjórastarvið. Hann var borgarstjóri á Eiði frá 2013 til 2020.

Av teimum 29 borgarstjórunum eru 22 menn og sjey kvinnur - tvær kvinnur fleiri enn fyri fýra árum síðani.