Kongressin skal góðkenna úrslitið av forsetavalinum

Amerikanska kongressin skal í dag alment góðtaka valúrslitið frá november, tá Donald Trump vann á Kamalu Harris um at gerast næsti amerikanski forseti.

Seinast, kongressin skuldi gera hetta, var 6. januar í 2021, fyri júst fýra árum síðan. Tá endaði tað í ruðuleika, tí Trump-stuðlar vildu forða kongressini í at viðurkenna valsigurin hjá Joe Biden.

So galið verður tað neyvan hesaferð. Størsti ruðuleikin kann vera ferðsluruðuleiki, tí veðurforsøgnin sigur, at ein ógvuslig kavaódn rakar amerikansku eysturstrondina í dag.

- Vallógin krevur, at hetta verður gjørt 6. januar klokkan 13.00, so kavaódn ella ikki, so vera vit í kongressini og syrgja fyri, at hetta verður gjørt, sigur talsmaðurin hjá Umboðsmannatinginum, republikanarin Mike Johnson, við Fox News.