Revsar ikki uttan ES er við

Danmark ger eingi revsitiltøk móti Russlandi, uttan semja er um tey í ES.

Tað svarar Morten Bødskod, vinnumálaráðharri, Sjúrði Skaale, fólkatingsmanni.

Sjúrður Skaale spurdi, um Danmark unilateralt, einsíðugt, fer at banna handli við russiskari olju og gassi, sum russiski skuggaflotin siglir við, hóast ES ikki kemur við slíkum banni.    

Sjúrður Skaale sigur, at Financial Times skrivaði 14. januar, at skipasmiðjur í Evropa framvegis veita skipum í skuggaflotanum tænastur, hóast Danmark og ES hava sett í gildi revsitiltøk móti russiska handlinum við olju og gassi.

Skipini í skuggaflotanum eru ikki skrásett í Russlandi fyri at sleppa undan revsitiltøkunum.