Nógvur makrelur fiskaður

Makrelfiskiskapurin á okkara leiðum í Atlantshavinum kann hava verið nógv størri árini 1972-2005 enn almennu veiðitølini siga.

Tað sigur Guðmundar J. Óskarsson á íslendsku havstovuni við Fiskifrettir.

Hann heldur, at makrelveiðan í landnyrðingspartinum av Atlantshavinum møguliga var 1,7 til 3,6 ferðir størri enn veiðitølini søgdu.

Hetta avlagaði stovnsmetingarnar nógv.

Og hetta er eisini orsøkin til, at nú er ein nýggjur leistur gjørdur fyri stovnsmetingina fyri 2014, sigur Guðmundar J. Óskarsson.

Árini 1972 til 2005 royndu nógvir verksmiðjutrolarar úr Eysturevropa eftir makreli.

Eingin veit við vissu, hvussu nógv tey fiskaðu.

Tá góður prísur fekst fyri stóran makrel í Japan er sannlíkt, at nógvur smáur makrelur er tveittur út aftur, sigur Guðmundar J. Óskarsson.

Fiskifrøðingar í øllum strandarlondunum, sum samráðast um makrel, hittast 17. til 21.februar næsta ár at eftirmeta vísindaligu ráðgevingina um makrel.