Samskiftið kundi verið greiðari

Á fundi í gjár vissaði aðalstjórin, Elin Mortensen,  Felagið Nótaskip um, at Ráðið altíð leggur seg eftir at leggja arbeiðið við kunngerðum soleiðis til rættis, at skipini sleppa til fiskiskap.

- Eins og stjórin í Felagnum Nótaskip skrivaði til Kringvarpið í gjár, kundi samskiftið ímillum Fiskivinnu- og samferðslumálaráðið og Felagið Nótaskip um at lýsa kunngerðina um norðhavssild havt verið greiðari frá báðum síðum. 

Tað skrivar aðalstjórin í ráðnum, Elin Mortensen, í telduposti til Kringvarpið í dag.

Bæði Ráðið og Felagið Nótaskip taka sostatt í egnan barm.

Við útvarpið ígjár segði stjórin í P/F Christiani í Grótinum, at óhepnar ásetingar í sildaavtaluni gera, at reiðaríið ikki fær eins nógva nyttu burturúr avtaluni við Noreg, sum tey høvdu ynskt. Hann vísti eisini á, at kunngerðin var lýst ov seint.

Dennis Holm, landsstýrismaður, segði hinvegin, at Fiskimálaráðið hevði ikki drálað, men hevði fingið at vita, at tað hevði ikki skund at lýsa kunngerðina. 

Og tað, sum var gjørt, var gjørt í tøttum samstarvi við Felagið Nótaskip, segði landsstýrismaðurin.

Fundur verið millum partarnar

Kringvarpið hevur biðið um innlit í samskiftið millum felagið og ráðið um kunngerðina um norðhavssild. Í telduposti í dag skrivar aðalstjórin millum annað:

"Talan hevur verið um nakrar styttri samrøður ímillum stjóran í felagnum Nótaskip og meg í januar, um nær kunngerðin fór at vera lýst. Eins og stjórin í Felagnum Nótaskip skrivaði til Kringvarpið í gjár, kundi tað samskiftið havt verið greiðari frá báðum síðum" skrivar Elin Mortensen.

Innlitið vísir, at ígjár var fundur millum stjóran í Felagnum Nótaskip, Páll Holm Johannesen, landsstýrismannin, Dennis Holm og  Elina Mortensen, aðalstjóra í Fiskivinnu og samferðslumálaráðnum.

Á fundinum varð samskiftið seinastu dagarnar um semjuna við Noreg um norðhavssild umrøtt, sæst á fundarfrásøgnini, sum aðalstjórin hevur skrivað undir.

Landsstýrismaðurin vísti til útsøgnina hjá stjóranum í P/F Christian í Grótinum um semjuna um norðhavssild við Noreg, sum varð undirritað hálvan desember. 

Hann vísti á, at felagið við fyrrverandi stjóranum hevur verið umboðað til allar samráðingarnar, og tætt samskifti hevur verið við umboð fyri vinnuna um gongdina í samráðingunum.