Verjumálaráðharrarnir í Nato hittast at viðgera støðuna í heiminum

NATO-verjumálaráðharrarnir hittast í dag og í morgin at tingast um alheimsstøðuna.

Miðlar skrivar, at eingin ivi er um, at tað verður Pete Hegseth, nýggi verjumálaráðharrin í USA, sum verður høvuðspersónur á fundinum, og sum mest verður lurtað eftir. 

Pete Hegseth verður fyri fyrstu ferð við á fundinum fyri verjumálaráðharrarnar. Fyrrverandi krígsveteranurin og sjónvarpsverturin á Fox News byrjaði í starvinum sum amerikanskur verjumálaráðharri síðst í januar.

Trump hartar Nato

Donald Trump, forseti,  hevur fleiri ferðir seinastu tíðina hartað verjusamgonguna og eisini hótt við at taka USA  úr Nato.

Trump hevur kravt, at hini londini í verjusamgonguni brúka meiri pening til verju. Hann hevur eisini hótt við, at hann vil ikki verja tey londini, sum ikki lata nóg mikið av peningi til verjusamgonguna.

Amerikanska stjórnin hevur ætlanir um at vaksa um útreiðslurnar til verjuna. Pete Hegseth hevur sagt, at hon skal í minsta lagi vera trý prosent av BTÚ.

Donald Trump hevur sjálvur sagt, at Nato-londini skulu upp á fimm prosent av BTÚ.