Forsætisráðharrin: USA leggur trýst á Danmark

Amerikanskir ráðharrar koma í hesi vikuni á vitjan í Grønlandi. 

Umsitingin hjá Trump hevur boðað frá, at trygdarráðgevin, Mike Walz, orkumálráðharrin Chris Wright og kona varaforsetan J.D.Vance, Usha Vanse, koma á vitjan í Grønland í ovurmorgin.

- Hetta kann ikki góðtakast. USA leggur trýst á Danmark, sigur danski forsætisráðharrin, Metta Frederiksen, við fjølmiðlar í dag:

Metta Frederiksen sigur, at vitjanin kann ikki takast sum eitt einstakt mál. Tað skal knýtast upp í alt tað, sum Trump hevur sagt um Grønland.

- Donald Trump skal takast í fullum álvara, tí hann vil hava Grønland, sigur danski forsætisráðharrin,  tá hon verður spurd um vitjanina:

Grønlendingar biðið um hjálp

Sambært amerikanska forsetanum, Donald Trump, eru tað grønlendingar, sum hava biðið USA um hjálp.

Á tíðindafundi í gjár varð hann spurdur, um vitjanin var enn ein provokatión, og hvat endamálið er við vitjanini:

- Hetta er ikki provokatión. Hetta er vinarlag, ikki provokatión. Vit hava við nógv fólk í Grønlandi at gera, sum fegin vilja síggja okkurt henda.Tey ringja til okkara. Vit ringja ikki til teirra, segði Trump.