Klaksvíkar kommuna mátti hækka kassakredittin fyri at svara hvørjum sítt

Eitt innlit, sum Kringvarpið hevur fingið í samskifti millum Klaksvíkar kommunu og Fíggjarmálaráðið, vísir, at Klaksvíkar kommuna hevur trupulleikar við gjaldførinum.

So stórir eru trupulleikarnir, at kommunan mátti biðja bankan um at hækka kassakredittin til at rinda lønir og rokningar í apríl mánaði.

Tann 26. februar skrivar Klaksvíkar kommuna í telduposti til Føroya Banka, at kommunan vantar gjaldføri og tí biður um at hækka kassakredittin við 10 milliónum.

Sagt verður, at upphæddin helst skal vera tøk í vikuni, og at sum støðan er í løtuni, er sannlíkt, at tað verður neyðugt at útvega meira gjaldføri í mars/apríl.

Rakar loftið fyri eina skattaálíkning

Tveir dagar seinni játtar Føroya Banki kommununi at hækka kassakredittin, men metir, at kommunan við hesum rakar meira enn eina skattaálíkning í skuld.

Tí vil bankin hava Fíggjarmálaráðið at góðkenna lántøkuna.

Í skrivi dagfest 5. mars góðkennir Fíggjarmálaráðið, at Klaksvíkar kommuna økir kassakredittin við 10 milliónum krónum.

Víst verður tó á, at gjaldførisætlanin hjá kommununi vísir, at tørvur helst verður á meira gjaldføri seinni í ár.

Klaksvíkar kommuna

Frítekst tagging: 

Karl Johansen

Signhild V. Johannesen

Sylvia Thomsen

Anfinn í Toft

Hermann R Samuelsen

Annika S. Biskopstø

Sitandi býráð beint eftir kommunuvalið (Savnsmynd)

Fund við landsstýriskvinnuna um skuldina

Tí biður landsstýriskvinnan í fíggjarmálum um fund við kommununa um, hvørjar ætlanir kommunan hevur, sum kunnu minka um skuldina.

Fríggjadagin 4. apríl er fundur millum Klaksvíkar kommunu og Fíggjarmálaráðið. Niðurstøðan á fundinum er, at kommunan skal senda umbøn at taka lán til bráðfeingis gjaldstørvin.

Fýra dagar seinni sendir Klaksvíkar kommuna Fíggjarmálaráðnum umsókn um at taka lán uppá 40 milliónir krónur.

Noyðist at endurskoða fíggjarætlanina

Men kommunan er longu illa sperd, tí í umsóknini verður millum annað sagt, at:

"...av tí at málið um lántøku ikki er avgreitt enn, verður neyðugt at leingja kredittin í Føroya Banka og at útvega aðrar 20 milliónir krónur í kreditti frá einum av peningastovnunum - møguliga Norðoya Sparikassa. Kreditturin skal vera tøkur, áðrenn lønir og kreditorar skulu rindast síðst í apríl."

Tveir dagar seinni, 10. apríl, gongur Fíggjarmálaráðið umsóknini hjá Klaksvíkar kommunu um at taka eitt lán uppá 40 milliónir krónur á møti.

Men Fíggjarmálaráðið biður kommununa senda eina endurskoðaða fíggjarætlan og eisini vísir á, hvørji átøk ætlanin er at fremja fyri at betra um raksturin.

Les eisini: Klaksvíkar kommuna er ikki so illa fyri sum støðan bendir á

Hoyr alt hetta innslagið við at trýsta á leinkið niðanfyri.