Arbeiðsleysir føroyingar í fremstu røð

Feløgini í Samtaki hava í dag verið á fundi við Johan Dahl, landsstýrismann við vinnumálum.

Á skránni var millum annað ætlanirnar hjá landsstýrinum um at lata upp fyri útlendskari arbeiðsmegi.

Feløgini siga, at har trot er á arbeiðsmegi, skal bera til á ein smidligan hátt at taka fólk inn.

Men tað skal ikki latast upp fyri útlendskari arbeiðsmegi sum heild, tí arbeiðsloysið er enn metstórt.

- So leingi vit hava 1000-1500 fólk, sum eru arbeiðsleys, kunnu vit ikki lata arbeiðsmarknaðin fullkomiliga upp, siga feløgini í Samtaki.

Johan Dahl vissaði Samtak um, at ætlanir ikki eru um at lata upp fyri allari útlendskari arbeiðsmegi, men bert tí arbeiðsmegi, sum tørvur er á.

Á fundinum umrøddu tey eisini høga arbeiðsloysi millum tey sum eru omanfyri 45 ár.

Tí er ætlanin at seta ein arbeiðsbólk, sum skal finna møguligar mátar at fáa júst hendan bólkin av arbeiðsleysum út á arbeiðsmarknaðin aftur.