Formaðurin í Politistafelagnum: Løgreglufólk merkja ágang í gerandisdegnum

Løgreglufólk merkja ágang í gerandisdegnum.

"Tað hendir regluliga, at løgreglufólk uppliva, at fólk blíva við at seta seg í samband við tey ella á annan hátt tráfylgja ella fremja sálarliga harðskap móti løgreglufólkunum," sigur Eyðun Dalsgarð, formaður í Poltitisafelagnum. 

Tí er tað í tøkum tíma, at løgtingið herfyri samtykti, at sálarligur harðskapur, tráfylging og ágangur fáa sjálvstøðugar ásetingar í revsilógini, heldur Eyðun Dalsgarð

Betri vernd

Við broytingunum fáa eisini alment sett starvsfólk, eitt nú løgreglufólk, betri verju móti ágangi og tráfylging. 

Eyðun Dalsgarð, formaður í Politistafelagnum, fegnast um nýggju ásetingarnar og vísir á, at løgreglufólk kunnu verða fyri tráfylging og ágangi upp á ymiskar mátar í gerandisdegnum.

Formaðurin í Politistafelagnum metir, at lógin er eitt týðandi stig móti betri vernd.