Sendistovu í Moskva fyri 3,25 milliónir krónur

Handilsbannið, sum ES setti í verk í summar, hevur uttan iva við sær, at útflutningurin til Russlands í ár verður metstórur, skrivar Løgmansskrivstovan á heimasíðuni.

Tí arbeiðir Løgmansskrivstovan við at seta eina sendistovu á stovn í Moskva. Tað fer at kosta 3,25 milliónir krónur.

Tørvurin á góðum handilsviðurskiftum við londini eystanfyri hevur sjáldan verið størri. Frá politiskari síðu verður støðugt arbeitt fyri at gera marknaðarmøguleikarnar betri.

Eisini hava alivinnan og pelagiska vinnan gjørt vart við seg, og vilja hava so góð handilsviðurskifti sum gjørligt við londini eystanfyri.

Løgmaður í Russlandi

Fyri at betra um møguleikarnar, var Kaj Leo Holm Johannesen, løgmaður í farnu viku á fundi í Russlandi og Kasakstan í eini roynd at tryggja føroyskum útflytarum so góðar treytir sum gjørligt.

Meginparturin av útflutninginum til londini eystanfyri, er laksur og uppsjóvarfiskur, og um tað ber til at beina tollforðingar av vegnum, so kann útflutningurin vaksa munandi, skrivar løgmaður, Kaj Leo Holm Johannesen.

Arbeitt verður samstundis við at betra um handilsviðurskftini við Kina, Brasilia og Turkaland, og við at fáa ein fríhandilssáttmála við Ukraina, stendur m.a. á heimasíðuni hjá Løgmansskrivstovuni.