Vónin 45 milliónir í avlopi í fjør

Vónin hevði 45 milliónir í avlopi eftir skatt í fjør. Fyrraárið var avlopið 46,6 milliónir krónur.

Vónin-samtakið er veitari til fiski- og alivinnuna. Talan er um ymisk sløg av trolum, nótir, skiljiristir, trollemmar, og annað umframt útgerð til alivinnuna.

Samtakið fevnir um feløg í Føroyum, Grønlandi, Skotlandi, Kanada, Danmark, Noregi og Litava.

Í Føroyum hevur Vónin tríggjar deildir. Ein deild er við Norðskála til alivinnuna, ein deild í Fuglafirði til uppisjóvarvinnuna og ein deild í Havn til botn- og rækjutrolvinnuna.

Í samtakinum eru 22 deildir.

Í 2024 var miðaltalið av starvsfólkum hjá samtakinum 460. Harav starvast 101 av teimum í Føroyum, skrivar samtakið í tíðindaskrivi.