Nawrocki verður nýggjur forseti í Póllandi

Konservativa valevnið, Karol Nawrocki, verður nýggjur forseti í Póllandi.

Tað er greitt, nú pólsku myndugleikarnir hava almannakunngjørt úrslitið av seinna valumfari, og tað gjørdist akkurát líka spennandi, sum roknað varð við undan valinum.

Endaliga úrslitið gjørdist, at Karol Nawrocki fekk 50.89 prosent av atkvøðunum, og Rafal Trzaskowski fekk 49,11 prosent, skrivar pólski miðilin tvpworld.com, og tí verður tað Nawrocki, sum tekur við sum forseti eftir Andrzej Duda.

Og tað er kanska ikki bara gott fyri politisku skipanina í Póllandi, skrivar tvpworld.com

Rafal Trzaskowski

Forsetavalið var javnt. Avbjóðarin, Rafal Trzaskowski, fekk 49,11 prosent av atkvøðunum. (Mynd: Reuters/Ritzau Scanpix)

Karol Nawrocki er konservativur og hevur stuðul frá nationalistiska flokkinum PiS, og hansara linja sampakkar ikki við ta ES-vinarligu linjuna hjá Donald Tusk, forsætisráðharra, og stjórn hansara.

Valdsskipanin í Pólandi er soleiðis skrúvað saman, at tað ikki er vanligt, at forsetin sjálvur ger lógaruppskot. Harafturímóti hevur hann vetorætt, og júst henda rættin hevur Andrzej Duda brúkt fleiri ferðir móti Donald Tusk seinastu 18 mánaðirnar.

Tí hevur stjórnin hjá Donald Tusk ikki hildið fleiri av vallyftunum, sum hon varð vald uppá, og sambært tvpworld.com er sannlíkt, at Nawrocki fer at halda somu kós sum undanmaðurin í forsetasessinum.