10-mannaførini: Undirmettu Havnarbátin

Spenningurin var øgiligur, tá Havnarbáturin og Klaksvíkingur stríddust um fremsta plássið á norðoyastevnu. 

Tak fyri tak fylgdust tey bæði 10-mannaførini inneftir vágni, meðan Norðoyingur mátti sleppa. Endin var, at drekastevnið fór fyrst um mállinjuna til stóra gleði fyri tey, sum hava longst eftir einum sigri til Havnarbátin síðan 2008.

Hinvegin kom ósigurin illa við hjá Norðingi og kanska serliga hjá Klaksvíkingi, sum var á heimasjógvi, men tey máttu viðganga, at tey kanska høvdu undirmett hvíta bátin úr Havn.

 - Eg haldi ikki, at tú kanst siga nakað annað. Vit vistu, at Havnarbáturin var góður. Hatta eru jú mans, sum vóru føroyameistarar í 8-mannaførunum í fjør, men eg hevði ikki væntað hatta. Teir hava tikið okkum á bóli, segði Brandur Kjølbro á Klaksvíkingi eftir róðurin.

 - Vit trúðu nokk, at mesta kappingin fór at koma frá Klaksvíkingi, viðgekk Maria Waag, róðurskvinna á Norðingi. 

Teir á Havnarbátinum vóru sjálvsagt ovurfegnir um sigurin og framúr góðu byrjanina upp á kappróðrarsummarið, men úrslitið kom ikki óvart á.

 - Ja, vit høvdu væntað at vunnið, staðfesti Kristian Linklett Mortansson, bátsformaður.

 - Hetta er tað, sum vit hava vant fram ímóti, men vit væntaðu sjálvandi harða kapping frá Norðingi og Havnarbátinum. Vit eru væl nøgdir við úrslitið í dag.

Sí innslag um 10-mannafarsróðurin omanfyri. (Mynd: Jan Herman Hansen)