Sangir úr mínum lívi: Torleik Mortensen greiðir frá sínum sangum

Í sendingini greiðir Torleik frá teimum sangum, hann hevur valt, og hvat teir merkja fyri hann – bæði sum tónleikara og sum menniskja.

Torleik Mortensen er hálvur føroyingur, og er føddur og uppvaksin í Jútlandi, men flutti til Føroya í 2013. Pápin er urguleikarin Gudmund Mortensen, og mamman, Ellis Mortensen, er dani og keramikari.

Hann hevur kandidatútbúgving frá rytmiska konservatoriunum í Keypmannahavn, og virkaði sum tónleikari í Keypmannahavn frá 2000 til 2013. Hann hevur millum annað spælt við danska bólkinum Cody, og framført á stórum pallum sum DR Konsertsalinum og spælt á Roskilde Festivalinum. Eisini hevur hann verið evropameistari í siðbundnum jazzi.

Síðani hann flutti til Føroya, hevur hann spælt við mongum føroyskum tónleikarum og bólkum - eitt nú Anniku Hoydal, Flytifólkum, Konni Kass, Knút, Silvurdrongi, Svartmálm, Yggdrasil, Jógvani og Teiti. Umframt hetta spælir hann eisini við Føroya Symfoniorkestri.

Torleik hevur eisini bólkin hettarher saman við Andriasi Restorff – eitt listaligt samstarv, har teir sameina akustiskt og elektroniskt ljóð, improvisatión og kompositión. Hettarher hevur gjørt tónleik til fleiri filmar m.a. til nýggja føroyska spælifilmin hjá Sakaris Stórá 'Seinasta paradís á jørð'.

Tónleikur hevur altíð verið ein stórur partur av lívinum hjá Torleiki. Hann byrjaði at spæla violin, tá ið hann var 5 ára gamal, el-guitar sum 12 ára gamal, el-bas sum 16 ára gamal og kontrabas sum 17 ára gamal. Í ár 2000 flutti hann til Keypmannahavnar, har hann at byrja við gekk á MGK (Musikalskt Grundkursus) og síðan á rytmiska konservatoriunum.

Í dag býr hann í Havn saman við unnustuni Fríðu Hansen og synunum Torbjørn og Gutta, og livir av tónleikinum.

torleik_mortensen_sangir_ur_minum_livi_1.png

Caption: 

Torleik Mortensen á tónleikaferð í Russlandi (Mynd: Privat)

Í sendingini hjá Torleiki verða hesir sangir spældir og umrøddir:

Dvorak: Humoresque

Kim Larsen: Tarzan Mama Mia

Illdisposed: Psychic Cyclus I-III

John Scofield: A Go Go

Radiohead: Packt Like Sardines In a Crushd Tin Box

Beatles: I’m Only Sleeping

Leonard Cohen: Dance Me to the End of Love

hettarher: Livandi Ljós