Løkke ætlaði at keypa floksfelaga úr fólkatinginum

Dagført kl. 13:04

Formaðurin í danska stjórnarflokkinum Moderaterne, Lars Løkke Rasmussen, sum eisini er uttanríkisráðharrri, er komin í andglettin, eftir at tað er komið undan kavi, at hann ætlaði at keypa ein floksfelaga úr fólkatinginum.

Mike Fonseca, sum var valdur í fólkatingið fyri Moderatarnar í 2022, fekk boðið umleið 370.000 kr. fyri at fara úr tinginum.

Tilboðið fekk hann dagin fyri, at tað kom fram, at Mike Fonseca var í parlagi við eina 15 ára gamla gentu, skrivar danska Frihedsbrevet í nýggjari bók.

Bòkin er gjørd út frá samrøðum og fundum, sum Fonsesca hevur havt við Lars Løkke Rasmussen og leiðsluna í Moderaterne. Mike Fonsesca hevur latið Mads Brugger í Frihedsbrevet upptøkurnar.

Tær 370.000 kr. svara til hálva ársløn í fólkatinginum, sum hann skuldi fáa fyri sálarfrøðiliga hjálp og nógvu miðlaumrøðuni av málinum. 

Mike Fonseca  tók ikki av tilboðnum, og gjørdist í staðin uttanflokkamaður.

Spurdi sjálvur um pengarnar

Floksskrivarin hjá Moderatunum Britt Bager sigur, at tað var Mike Fonseca sjálvur, sum spurdi um pengarnar.

Tað sigur DR.

Lars Løkke Rasmussen sigur í boðum til danska TV2, at Mike Fonseca setti seg sjálvan og flokkin í sera trupla støðu. 

- Vit royndu at loysa støðuna forvirkið (proaktivt) við fleiri samtalum við hann. Hetta var ein sera óvanlig støða, sum vit royndu at loysa, har vit vístu fyrilit fyri Mike og familju hansara, og samstundis vardu flokkin. Fyri allar partar hevði eg helst vilja sæð tað endað øðrvísi, sigur Lars Løkke Rasmussen í skrivligum boðum til TV2 í dag.