11 ákærur um pornografi og blúnisbrot

Ein 37 ára gamal maður skal í Føroya rætt í dag, har hann skal hoyra 11 ákærur um brot á revsilógina um pornografiskt tilfar um fólk, sum eru yngri enn 18 ár, og um blúnisbrot.

Í nøkrum ákærum um pornografi er talan um serliga tyngjandi umstøður.

Sambært ákæruritinum er talan um myndir og sjónbond í øllum trimum kategorium.

Maðurin er ikki ákærdur fyri at gera pornografiskt tilfar, men fyri at hava tað og senda øðrum tað.

Í ákæruritinum eru nevnd 34 lógarbrot. Øll skulu vera framd í fjør summar.

Føroysk børn og ung eru ikki eyðmerkt í pornografiska tilfarinum, sum er nevnt í ákæruritinum.

Maðurin er ákærdur eftir grein 236 í revsilógini, sum er um barnaporno, og eftir grein 232, sum er um blúnisbrot.

Maðurin noktar seg sekan.