Sangur og spæl umborð á Jóhonnu

“Ein rukkutúr afturat, tað ger ikki petti”.

Tað var tað, Bjartur Skipanes hugsaði, tá hann bleiv spurdur, um hann hevði hug at koma við sluppini Jóhonnu til Orkunoyggjar. 

Bjartur er ein av teimum 17 monnunum, sum hava siglt við gomlu sluppini úr Vági til Kirwall, nú oyggjaleikir eru. Túrurin tók 30 tímar.

Miðalaldurin á manningini er omanfyri 70, fortelur Poul Jacob Thomsen, men tað heldur teimum ikki aftur. Teir syngja og spæla. Lagið er gott og teir hava nógv føroysk vitjandi umborð. Nógv verður skemtað, og tað er ein serlig sjargon millum manningina.

“Nú fer Tórshavnar kommuna nokk eisini at stuðla Jóhonnu”, sigur Jens Jacob Olsen skemtiliga, tí borgarstjórin í Havn er millum tey, sum vitja sluppina leygarkvøldið.

Blíðskapurin er í hásæti. Manningin grillar búffar til gestirnar, og stutt er millum snapsirnar.

Túrurin úr Føroyum var harður. Tað bæði rullaði og lak illa, og menn vóru hart raktir av sjóverki.

“Eg havi sovið í vátari koyggju við vátari dýnu á túrinum niður”, fortelur Bjartur Skipanes. “Men síðani sluppin legði til kei, hevur sólin bakað niður, og vit hava hugnað okkum”, sigur hann.