Leggja seg skerfløt og taka atfinningar í álvara

- Vit leggja okkum púra skerfløt og taka atfinningarnar í álvara.

Tað sigur Leivur Persson, stjóri á Arbeiðs- og brunaeftirlitinum, eftir lemjandi atfinningar frá Løgtingsins umboðsmanni.

Leivur Persson

Leivur Persson.

Umboðsmaðurin fekk frá januar til mars í ár fýra klagur um málsviðgerðartíð og vantandi svar frá Føroya Vanlukkutryggingarráð og Arbeiðs- og brunaeftirlitinum í sambandi við arbeiðsskaðamál. 

Málini høvdu verið virkin í meira enn hálvt triðja ár, uttan at endalig avgerð ella fyribilsavgerð var tikin. Harumframt høvdu klagararnir í fleiri umførum ikki fingið svar ella afturboðan til fyrispurningar sínar. 

Átalan er so álvarslig, at fráboðan um hana er send formansskapinum í løgtinginum, løgmanni og landsstýriskvinnuna í umhvørvismálum.

400 mál fylgdu við yvirtøkuni

Arbeiðs- og brunaeftirlitið yvirtók umsitingina av arbeiðsskaðamálum frá Sorinskrivaranum í Føroyum í januar 2024.

Við tí fylgdu 400 mál við.

Í apríl 2025 vóru fleiri enn 850 mál.  Av teimum hevur Arbeiðs-  og brunaeftirlitið 700 eftir at avgreiða. 

Men nýggj mál leggjast aftrat alla tíðina, og í løtuni eru umleið 750 virkin mál.

Leivur Persson sigur, at ymisk tiltøk eru sett í verk til tess at venda gongdini.

Hoyr innslag í útvarpstíðindunum: