Tingfólk verða kunnað um Suðuroyartunnilin í dag

Seinnapartin verður kunningarfundur í Tinganesi fyri tingfólki um Suðuroyartunnilin.

Upprunaliga skuldi fundurin vera fyri sonevndu tunnilsnevndini, har hvør flokkur hevur tvey umboð. Men fríggjadagin kom innbjóðing til øll tingfólk um at møta til  innanhýsis fund í Tinangesi. Sum skilst verður framløga av avgerðarnotati, sum lýsir tvær farleiðir, og framløga av kostnyttukanning.

Í novembur í fjør varð semja undirritað av umboðum fyri allar politiskar flokkar á løgtingi.

Í semjuskjalinum varð avtalað, at undirsjóvartunnil skuldi gerast millum Djúpadal norðan fyri Skarvanes og Sandvik í Suðuroy, við møguleika at knýta Skúgvoy upp í tunnilin seinri.

Suðuroyartunnil og Sandoy

Sum skilst verður nýggja farleiðin um tunnil av Sandi, sum skal koma upp í Skúgvoy og viðari til Sandvíkar, løgd fram á kunningarfundinum í dag. 

Øðrvísi linjuføring

Men longu, tá lógaruppskotið um Suðuroyartunnil var til almenna hoyring, vóru sjónarmið frammi um, at ein Suðuroyartunnil skuldi hava eina øðrvísi linjuføring. Skotið varð upp at gera tunnil av Sandi, sum so kundi koma upp í Skúgvoy, og so víðari til Sandvíkar.

Lógaruppskot kom í løgtingið í mars í ár, og tá bar ikki til at fáa málið samtykt. Viðurskifti, ið vórðu viðgjørd í Løgtinginum, vóru m.a. linjuføring og trygd í tunlinum. Málið datt burtur, tá nýggj tingseta byrjaði á ólavsøku.

Løgmaður gjørdi í juni avtalu við politisku forfólkini og politiska fylgibólkin um m.a. at gera avgerðarnotat, ið lýsir tvær farleiðir.

Tá tilfarið er framleitt, verður politisk støða tikin, stendur í tilfarinum til ólavsøkufrágreiðing løgmans í ár.