Eyskarið hjá elsta føroyska bátinum er funnið

Í mai mánaði kom Hvanngarðurin, tíggjumannafarið hjá Syðrugøtumonnum, við vælvild úr Noregi aftur til Eysturkommunu, har hann nú stendur á Báta- og listasavninum.

Saman við Hvanngarðinum komu fleiri aðrir lutir, ið hoyra til ein róðrarbát,men einki eyskar.

Eyskarið var blivið burtur á Norsk Maritimt Museum, hóast fólk á Bátasavninum vistu, at eyskarið hevði verið til stutt frammanundan.

Hetta av tí, at Andrass Joensen, bátasmiður ættaður av Húsum, fyri gott 10 árum síðani var í Noregi fyri at taka mát av bátinum og eisini av eyskarinum.

Eyskar, Hvannagarður, Elsti føroyski báturin

Camilla Nordeng, Norsk Folkemuseum, vísir eyskarið fram fyri Astrid Johannessen, mentanar- og ferðavinnuleiðari, í Eysturkommunu

Funnið í norskari goymslu

Tí var tað gleðiligt, tá boðini fyri stuttum komu, at nú var eyskarið funnið á einari goymslu.

Mánadagin var umboð úr Eysturkommunu í Oslo á Norsk Maritimt Museum at avheinta eyskarið, ið sjálvandi skal vísast fram saman við Hvanngarðinum.

Eyskarið – og Hvanngarðurin – eru at síggja á Báta- og listasavninum í Leirvík.

Dagur og vika var á staðnum, tá elsti føroyski báturin kom heimaftur.