Maria Jørðdal Niclasen nýggjur dómpróstur

Løgmaður hevur tilnevnt Mariu Jørðdal Niclasen dómpróst. Hon tekur við embætinum tann 1. februar, skrivar fólkakirkjan. 

Embætið var lýst leyst at søkja í august. Tríggjar umsóknir komu.

Áðrenn løgmaður tilnevndi nýggja dómpróstin, vóru trý lið í viðgerðini: Kirkjuráðini, biskupur og landsstýrismaðurin í kirkjumálum.

Prestvígd í 2013

Maria Jørðdal Niclasen var prestvígd í dómkirkjuni 27. januar 2013. Hennara fyrsta kall var eystan Múla. Hon gjørdist prestur í Norðoya eystara prestagjaldi 1. februar sama ár.

Maria Jørðdal tók í mars 2015 við kallinum í Norðstreymoyar prestagjaldi við sæti í Kvívík. Haraftrat hevur hon verið prestur teirra deyvu.

Sunnudagin 25. januar skipar biskupur Mariu Jørðdal Niclasen í embætið sum dómpróstur.

Spennandi starv

- Nógv í starvinum er spennandi og avbjóðandi, sigur Maria Jørðdal Niclasen.

Hoyr samrøðu í útvarpstíðindunum