Landsroynd í náttúru og tøkni í fjórða flokki verður tikin av

Ein landsroynd í fjórða flokki í fólkaskúlanum skal strikast.

Djóni Nolsøe Joensen, landsstýrismaður í barna- og útbúgvingarmálum, ætlar at taka av landsroyndina í náttúru og tøkni í fjórða flokki.

Uppskot er gjørt um at broyta fólkaskúlalógina. Tað er sent til hoyringar.

Endamálið við uppskotinum er, at undirvísingin í náttúru og tøkni í fjórða flokki meira skal byggja á upplivingar, verkligt arbeiði og kanningar, sum eru grundarlagið undir lærugreinini.

Kann taka ov nógva tíð

Landsroynd longu í fjórða flokki kann taka ov nógv av tíðini frá tí praktiska og kannandi arbeiðinum, sum skal vekja forvitni og menna náttúruvísindaligar arbeiðshættir hjá næmingunum, sigur landsstýrismaðurin. 

Hetta er eisini í samsvari við tilmæli hjá Fólkaskúlaráðnum, sum kom í oktober í fjør.

Í sambandi við fyrireikingina hevur málið verið til undanhoyringar hjá viðkomandi pørtum, og flestu teirra tóku undir við ætlanini, stendur í tíðindaskrivi frá Barna- og Útbúgvingarmálaráðnum.

Les uppskotið her.