Samráðast aftur um frið í Ukraina

Hóast vónirnar um frið í Ukraina millum ukrainar eru avmarkaðar, serliga eftir russisku álopini í gjárkvøldið og í nátt, eru samráðingarnar byrjaðar aftur.

Nú er tað tó ikki í Sveis, men í Adu Dabi á arabisku hálvoynni, skrivar danska kringvarpið.

Eftir fundirnar í Sveis um vikuskiftið vóru russar misnøgdir, kanska serliga, tí farið varð frá amerikonsku ætlanini, sum gav russum nógv av tí, sum teir vildu hava, til evropeisku ætlanina, sum gevur ukrainum meira at arbeiða við.

Tá samráðingarnar í Sveis byrjaðu, var tað eitt krav frá amerikanska forsetanum, at partarnir skuldu koma við einum svari í seinasta lagi í morgin. Men sambært norska kringvarpinum sigur forsetin nú, at freistin fyri hann er, tá kríggið er endað.

Steve Witkoff og Vladimir Putin 6. aug. 2025

Eftir ætlan fer amerikanski sendimaðurin hjá USA, Steve Witkoff, at hitta Vladimir Putin, forseta, í næstu viku. Henda myndin er frá vitjan hansara í Moskva í august. (Mynd: Gavriil Grigorov/Reuters/Ritzau Scanpix)

Um midnáttarleitið segði Donald Trump, forseti, journalistum umborð á Air Force One, at hann ætlar, at serligi sendimaðurin hjá USA, Steve Witkoff, skal hitta russiska forsetan, Vladimir Putin. Amerikanski forsetin vónar og væntar, at hesin fundurin verður í næstu viku.

Hóast partarnir aftur eru farnir til samráðingarborðið, so er greitt, at framvegis er einki gjørt við størstu knútarnar í samráðingunum. Tað eru viðurskiftini um ukrainsku økini, sum russar hava hertikið.