Jóan Petur Vang keypt grundstykkini í Leitinum

Smápartafelagið Jóan Petur Vang keypir grundstykkini í Leitinum í Saltangará til íbúðarbygging.

Tað var samtykt á býráðsfundi í Runavíkar kommunu í dag.

Felagið skrivaði undir avtalu við Runavíkar kommunu fíggjadagin í farnu viku um bygginina í Leitinum, treytað av, at býráðið tók undir við málinum.

Tað hevur býráðið nú gjørt, og smápartafelagið Jóan Petur Vang keypir økið, sum er okkurt um 12.300 fermetrar til víddar.

Hetta felagið byggir frammanundan 45 eigaraíbúðir á havnarlagnum, norðan fyri Fjøruvegin í Runavík. 

Ætlan datt niðurfyri

Í 2021 gjørdi felagið St. Jørgen Ejendomme Aps. avtalu við Runavíkar kommunu um at byggja íbúðir í útstykkingini í Leitinum. 

Tað var smápartafelagið í Leitinum, sum er dótturfelag hjá St. Jørgen Ejendomme Aps., sum skuldi byggja 180 íbúðir í Leitinum.

Verkætlanin datt tó niðurfyri fyrr í ár.

Runavíkar kommunan hevur síðan keypt økið aftur, og í heyst bjóðaði kommunan økið út til íbúðarbygging av nýggjum.

Tað hevur smápartafelagið Jóan Petur Vang nú keypt.