Faroe5 eru aftur: Tónleikur, vinaløg og vónir fyri 2026

Væl umtókti kvinnubólkurin Faroe5 er nú komin aftur á føroyska tónleikapallin eftir ein langan steðg á 15 ár. Tað eru enn tær somu genturnar, sum nú eru vorðnar kvinnur og mammur – enn tann sama gleðin fyri tónleikinum, og alt er enn "bara eitt spæl". 

Tað var heilt av tilvild, at tær fimm funnu saman aftur fyri at gera tónleik. Lillian Dalsgaard greiðir frá, at tá ið hon flutti heim aftur til Føroya eftir nógv ár uttanlands, var tað upplagt at hittast og tosa um gamlar dagar. Hetta førdi til, at tær í dag sita saman og eru farnar at syngja aftur. 

Tað var heldur ikki gingið heilt upp fyri teimum, hvussu nógv tónleikur teirra enn livir millum tey ungu, sigur Ragnhild Dam. Tí var tað eisini so upplagt at takka ja til at koma aftur á pall til Lestrargonguna í Keypmannahavn í heyst. 

faroe5_nýggjárssendingin2025

Fyrr í ár settu tær lív í Lestrargonguna í Keypmannahavn, ið var fyrstu ferð, tær stóðu saman á palli í 15 ár.

Tað er eingin loyna, at nógv er hent hesi seinastu 15 árini, nú tær allar eru vaksnar kvinnur og hava nógv um at vera í gerandisdegnum. Men tær høvdu brúk fyri at síggjast aftur, og tað var nakað, tær høvdu longst eftir. Við árunum duga tær betri at síggja styrkirnar og veikleikarnar hjá hvørjari aðrari, og eisini at hvíla meira á pallinum. 

“Vit duga betri at stuðla hvørjari aðrari av tí sama. At byggja hvørja aðra upp, geva konstruktivan kritikk – og rósa hvørjari aðrari. So tað er faktiskt ordiliga positivt og deiligt at venja saman og syngja saman aftur,”

sigur Jónvá Ellingsgaard.

Nógv er broytt hesi árini, men nógv er eisini akkurát tað sama, sum tað altíð hevur verið. 

Vígdis Fjallstein greiðir frá, hvussu kensluborið tað var at syngja saman aftur, tí kemi og klangur vóru har enn. Tær hava sítt heilt egna ljóð, tá ið tær syngja saman. 

Eitt spennandi ár í væntu 

Nýliga varð kunngjørt, at Faroe5 skulu spæla á Summarfestivalinum 2026, og tær eru longu farnar undir fyrireikingarnar. Tær hava stórar ætlanir fyri konsertina og kundu hugsað sær at havt rekvisittir og fýrverk á pallinum. 

Lillian leggur afturat, at okkurt nýtt eisini er á veg frá Faroe5, so vit kunnu gott gleða okkum, sigur hon við einum stórum smíli.