Armgarð Arge: "Tað hjálpir øðrum, at fólk tora at siga sína søgu"

Í vár verður væl umtókta sendingin Credo hjá Armgarð Arge aftur á skránni sunnudagar í útvarpinum.  

"Credo er ætlað at vera sending, sum varpar ljós á og sigur frá søgum, sum vit føroyingar hava upplivað og fegin vilja siga frá," greiðir Armgarð Arge frá.   

"Tað er ein sannroynd, at tá tú hoyrir søguna hjá einum øðrum, so gerst tað lættari hjá tær at bera okkurt, tí so kennir mann seg ikki einsamallan - bæði tá lívið er gott, og tá tá tað brýtur í bæði borð. 

Vilt tú siga mær tína søgu?

Armgarð Arge greiðir frá, at endamálið við Credo hevur altíð verið einfalt, og tað er spurningurin: "Vilt tú siga mær tína søgu?"

"Og so stendur søgan einsamøll. Onki við at virðismeta ella viðgera."

Í sambandi við Credo í vár, so leitar Armgarð Arge eftir fólki, sum hava upplivað okkurt øðrvísi - okkurt "hinumegin", sum hon tekur til. 

"Eg havi áður havt nakrar sendingar um fólk, ið hava uppliva okkurt, sum vit vanliga siga ikki er 'vanligt'. Vit eru vaksin upp í mentan, har fólk hava sagt frá skipum, sum eru gingin burtur. Um fólk í hamferð. Og um fólk sum hava nærdeyðanumuppliving og hava sæð 'nakað himmalskt'.

 

 

 

 

View this post on Instagram

 

 

 

 

 

 

 

 

 

 

 

A post shared by Kringvarp Føroya (@kringvarp)

Credo skal endurspegla føroyingin

Armgarð Arge heldur, at í dag aftra fólk seg við at siga frá sovorðnum upplivingum, tí tey óttast at onnur kansk halda, at tey eru órógvað ella ikki í ordan.

"Men hesar søgur eru eisini áhugaverdar og nakað, ið fólk tíma at lurta eftir. Credo skal helst vera sending, sum rúmar øllum tí, sum vit trúgva og hugsa um, og sum  rørir seg millum fólk. Vit vilja gjarnar endurspegla føroyingin í sendingini."

Hevur tú upplivað okkurt hinumegin mótvegis okkum, sum eru hesumegin, og tú vilt siga tína søgu, so vil Armgarð Arge gjarna hoyra frá tær. 

"Í roynd og veru, so eru allar serstakar persónligar søgur áhugaverdar."

Skrivið til: credo@kvf.fo