Suni Merkistein: - Mær dámar fult so væl at fylgja kappingini úr Føroyum

Hann hevur verið ítróttafrásøgumaður í áratíggju. Suni Merkistein hevur verið óteljandi uttanlandsferðir í útvarps- og kringvarpsørindum. Hann var eisini við á minniligu hondbóltsferðini í Berlin.

Flestu høvdu ivaleyst væntað, at frásøgumaðurin eisini fór til Noregs saman við túsundtals føroyskum hondbóltsfjepparum. Men so er ikki.

Um árskiftið gjørdi Suni av, at hann verður í Føroyum.

Tær mongu og ofta drúgvu uttanlandsferðirnar eru ikki líka freistandi longur.

Tað krevur meira at vera á ferð, og kanska ein ávís metalmøði eisini ger um seg, ásannar hann.

Á ein hátt ber betur til at fylgja kappingini heima í stovuni. Tá fært tú hugsavnað teg um øll liðini á ein annan hátt, sigur Suni Merkistein.

Mítt EM verður at finna viðkomandi søgur og vinklar til EM-tíðindini, sigur fólkakæri miðlamaðurin.